Dinbych-y-pysgod yn cael y signal ffôn gwaethaf yn y DU
Yn ôl Which?, Dinbych-y-pysgod yw'r lle gwaethaf yn y Deyrnas Unedig o ran ansawdd signal ffôn symudol. Bydd miloedd yn ymweld â'r dre' glan môr dros ŵyl y banc, ond mae pryderon ynghylch faint o'r ymwelwyr fydd yn gallu cael signal ar eu ffôn symudol.
Yn 2025, cod post Dinbych-y-pysgod oedd y lle gwaethaf yn y DU o ran ansawdd signal ffôn symudol, yn ôl cwmni Which?. Yn gynharach eleni, cafodd mast ffôn yn yr ardal ei ddadgomisiynu heb gael ei ailosod eto.
Mae cwmnïau Vodafone, Three ac O2 wedi ymddiheuro i gwsmeriaid a gafodd eu heffeithio gan y sefyllfa.
Effaith ar fusnesau lleol
Yn ôl trigolion, mae cael signal ffôn mor wael yn yr ardal yn anodd iawn. Dywedodd Guy Manning, sy'n rhedeg siop gelf yn y dre',
"dydy pobl ddim yn deall pa mor rhwystredig yw hi i fusnesau."
Mae'n anodd iddo achos dydy pobl ddim wastad eisiau 'ôl arian mas'.
"Mae'n gallu bod yn anodd cymryd taliadau cerdyn achos y signal gwael."
Ychwanegodd ei fod yn poeni ei fod wedi colli cwsmeriaid oherwydd y problemau.
"Hoffwn i wella'r signal i bawb."
Roslyn Moore, sy'n rhedeg llety gwyliau ar draeth y gogledd, dywedodd,
"Dwi wedi clywed bod busnesau yn y dre' yn eithaf upset am yr holl beth.
Mae pobl methu talu ambell waith ar yr aps, neu talu am barcio achos mae hynny'n digwydd ar yr aps. Mae'n broblem fawr."
Dywedodd hefyd fod y dref yn ddibynnol ar dwristiaid adeg y flwyddyn hon.
"Mae'n bwysig bod y busnesau yn cael y bobl mewn ac mae'n bwysig bod y bobl sy'n dod yma'n hapus. Mae angen sortio hwn mas."
Statistigau ansawdd signal
Yn ôl Which?, dim ond 54.3% o'r amser y profodd defnyddwyr ffonau symudol gysylltiad da yn Ninbych-y-pysgod. Cafodd Llandrindod ei enwi fel yr ail god post gwaethaf o ran ansawdd signal ffôn, gyda sgôr o 54.8%.
Ymwelwyr yn mynegi eu rhwystredigaeth
Mae'r diffyg signal yn "rhwystredig" i ymwelwyr fel Julie Robinson a Paul Wiston.
Dywedodd Paul Wiston o Congleton yn Sir Gaerleon y byddai'n "anodd" iddo ymweld â Dinbych-y-pysgod eto.
"Rwy'n hunangyflogedig felly does dim byd gwaeth pan dyw pobl methu cysylltu â chi.
Alla i ddim hyd yn oed cael rhagolygon y tywydd i fyny. Dwi'n meddwl ei fod yn lle hyfryd ond signal ofnadwy.
Wnaethon ni gerdded adref neithiwr oherwydd oedden ni methu ffonio tacsi."
Daeth Jo a Martin Harrison o Birmingham ag arian parod ychwanegol oherwydd eu bod wedi clywed am broblemau gyda'r signal.
"Mae'n eithaf rhwystredig pan fydd angen i bobl gysylltu â chi a does gennych chi fynediad at y ffôn, ond dyw e ddim yn poeni ni."
Mae eraill yn falch i gael seibiant o'u sgriniau.
Dywedodd Lynne Cornish o Gwm Rhondda,
"Dim ond am ychydig ddyddiau rydyn ni i ffwrdd beth bynnag, felly dydw i ddim yn tueddu i ddefnyddio fy ffôn cymaint."
Dywedodd Frankie Bennet o Lundain ei fod ef a'i bartner ar wyliau i gael seibiant o'u ffonau symudol.
"Rydyn ni wedi dod yma i ddianc rhag hynny i gyd, felly dydy hi ddim yn rhy ddrwg."
Archwilio opsiynau dros dro
Yn ôl Vodafone a Three, mae'r signal gwael yn ganlyniad i ddadgomisiynu mast yn yr ardal.
Dywedon nhw:
"Mae'n ddrwg gennym i gwsmeriaid Vodafone a Three UK yn ardal Dinbych-y-pysgod sy'n profi problemau gyda'u gwasanaeth.
Rydym yn gweithio gyda'n partner seilwaith am ateb hir dymor ac yn archwilio opsiynau dros dro i helpu i adfer cysylltiad cyn gynted â phosibl."
Ychwanegodd llefarydd ar ran O2:
"Rydym yn ymwybodol o'r problemau signal yn Ninbych-y-pysgod ac yn ymddiheuro am unrhyw anghyfleustra y gallai hyn ei achosi.
Mae hyn oherwydd bod mast lleol yn yr ardal yn cael ei ddadgomisiynu.
Mae ein partner seilwaith, Vodafone, sy'n rheoli'r safle, yn gweithio cyn gynted â phosibl i leoli a gosod un newydd.
Mae mastiau eraill yn yr ardal wedi'u hoptimeiddio i helpu i leihau'r drafferth."
Cysylltu â Cymru Fyw
Dilynwch Cymru Fyw ar Facebook, X, Instagram neu TikTok.
Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
Pynciau cysylltiedig
Straeon perthnasol
- 'Teimlo yn ynysig' ar ôl bod heb wi-fi am bron i chwe wythnos
- Pentref gwledig wedi'i 'gau i ffwrdd' rhag y byd modern
