Trafodaethau rhwng Caerdydd a pherchnogion y Gweilch wedi dymchwel
Mae Undeb Rygbi Cymru (URC) wedi cadarnhau na fydd perchnogion y Gweilch yn prynu rhanbarth Caerdydd, gan fod y trafodaethau wedi dod i ben heb gyrraedd cytundeb.
Ym mis Ionawr 2026, cadarnhaodd URC eu bod mewn cyfnod cyfyngedig i gynnal trafodaethau gyda pherchnogion y Gweilch, Y11 Sport & Media, i drafod y posibilrwydd o brynu Rygbi Caerdydd. Roedd y cyfnod hwn i ddod i ben ym mis Mawrth, ond cafodd ei ymestyn am 30 diwrnod ychwanegol, tan ddydd Mercher, 22 Ebrill.
Erbyn hyn, mae URC ac Y11 wedi
"cytuno ar y cyd y byddai perchnogion y Gweilch yn tynnu yn ôl o'r broses"ar ôl
"trafodaethau adeiladol", ac mae Caerdydd yn parhau dan berchnogaeth URC.
Ni chafwyd manylion ynghylch pam y daeth y trafodaethau i ben, ond cadarnhaodd prif weithredwr URC, Abi Tierney, y bydd Caerdydd yn parhau i fod dan berchnogaeth y corff llywodraethu am y tro.
"Y11 cyflwynodd y cynnig gorau i brynu Caerdydd ond mae URC wedi dod i'r casgliad y byddai er budd gorau rygbi Cymru petai Caerdydd yn aros dan ein perchnogaeth am y tro," meddai Tierney.
"Rydym i gyd yn ddiolchgar iawn i Y11 am y proffesiynoldeb a'r ymrwymiad i rygbi Cymru y maen nhw wedi'i ddangos drwy gydol y broses hon."
Dilynwch Cymru Fyw ar Facebook, X, Instagram neu TikTok i gael y newyddion diweddaraf. Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033. Lawrlwythwch yr ap am y diweddaraf o Gymru ar eich dyfais symudol.
Pynciau cysylltiedig
Straeon perthnasol
- URC am orfod cynnal cyfarfod cyffredinol arbennig
- URC yn trafod gyda pherchnogion y Gweilch am brynu Caerdydd
- URC i dorri nifer y rhanbarthau rygbi o bedwar i dri erbyn 2027
