Dwy Chwaer o'r Bala yn Llwyddo ar Faes Rygbi Cenedlaethol

Dwy chwaer o'r Bala, Efa ac Alys Jones, wedi llwyddo'n fawr ar faes rygbi cenedlaethol, gan gynnwys buddugoliaeth y Bala yn ffeinal Powlen y Menywod a nifer o lwyddiannau eraill yn ystod 2022-2023.

Llwyddiant Dwy Chwaer o'r Bala ar y Cae Rygbi

Mae dwy chwaer o'r Bala wedi dathlu llwyddiant ar faes rygbi cenedlaethol, bedair blynedd ar ôl siom eu hymweliad cyntaf i Stadiwm y Principality yng Nghaerdydd.

Dywedodd Mair Jones ei bod hi'n gyd-ddigwyddiad rhyfedd iddi fynd a'i dwy ferch i'r stadiwm am y tro cyntaf erioed yn 2022 – dim ond i weld tîm cenedlaethol y dynion yn colli i Georgia.

Fodd bynnag, dathlu oedd hanes y chwiorydd Efa ac Alys ar eu hymweliad i'r brifddinas ddydd Sadwrn, wrth i'r Bala guro Machynlleth 29-17 yn ffeinal Powlen y Menywod Undeb Rygbi Cymru.

Ar ben hynny i gyd, meddai Mair, fe wnaeth Efa (sy'n flaenasgellwr ac yn 19 oed) sgorio cais a chael y clod o gael ei dewis yn seren y gêm.

Disgrifiad o’r llun, Efa Jones yn croesi am drydydd cais Y Bala

"Roedd hi'n braf bod yn y ffeinal, a braf chwarae yn erbyn Machynlleth," meddai Mair, sy'n wreiddiol o Dywyn, Meirionnydd.

"Ro'n i'n 'nabod lot yna – o bosib ddim y chwaraewyr ond y mamau a rhai o'r neiniau. Ond roedd o'n dda gweld dau dîm o'r gogledd yn y ffeinal.

"Be oedd yn ddoniol – cyn y gêm o'n i wedi bod yn tynnu coes Efa fel teulu. Ychydig o banter ei bod wedi bod yn y ffeinal o'r blaen a heb sgorio cais, a dyna ni wedyn i goroni'r cyfan dyma hi'n sgorio a chael seren y gêm."

Mae hefyd wedi bod yn flwyddyn brysur ar y meysydd chwarae i'r chwaer iau, Alys sy'n 18 oed ac yn mynychu Ysgol Godre'r Berwyn yn Y Bala.

Roedd hi'n aelod o dîm yr ysgol oedd yn fuddugol 28-5 yn erbyn Ysgol Bro Teifi yn ôl ym mis Mawrth yn ffeinal merched dan 18 Undeb Rygbi Cymru.

Alys a Mair yn dathlu ar ôl buddugoliaeth y Gwylliaid yn erbyn Quins Caerdydd

Ad (970x250)

Ad (425x293)

Disgrifiad o’r llun, Alys a Mair yn dathlu ar ôl buddugoliaeth y Gwylliaid yn erbyn Quins Caerdydd

Mae Alys hefyd yn asgellwr gyda thîm Gwylliaid Meirionnydd – sy'n rhan o rwydwaith hwb Undeb Rygbi Cymru i ddatblygu gêm y merched yng Nghymru.

Erbyn hyn mae yna 44 o dimau hwb wedi eu sefydlu yng Nghymru.

Daeth trydydd llwyddiant Alys mewn tymor prysur o rygbi nôl ym mis Rhagfyr wrth i'r Gwylliaid guro Quins Caerdydd yn ffeinal cwpan ieuenctid y merched.

Y gobaith nawr o ran y teulu a merched Bala yw y bydd y Gwylliaid yn dathlu tlws arall ym Mae Colwyn ddydd Sul, gyda thîm dan 18 y clwb yn wynebu MônStars o Langefni yn ffeinal cwpan RGC.

Merched Bala'n dathlu eu llwyddiant