Hyfforddwr ifanc o'r Bala gyda gyrfa rhyngwladol
Mae Mael Evans, hyfforddwr pêl-droed 27 oed o'r Bala, wedi gweithio gyda rhai o glybiau pêl-droed mwyaf adnabyddus y byd, gan gynnwys Juventus, Bayern Munich, a chlybiau yn America.
Ar hyn o bryd mae Mael yn ôl yn y Bala ar ôl gorfod ffoi o academi Juventus yn Kuwait oherwydd y gwrthdaro rhwng Israel ac Iran.
Dechrau'r yrfa a symudiad i America
Dechreuodd Mael ei yrfa hyfforddi yn 2013 yn y Bala cyn astudio rheoli pêl-droed a pherfformiad ym Mhrifysgol De Cymru. Yn 2019, symudodd i America i weithio gyda sêr dyfodol Bayern Munich.
"Dwi wedi bod yn reit lwcus dros y blynyddoedd i allu symud i lefydd gwahanol i fyw a chael profiadau gwahanol gyda gwahanol glybiau," meddai Mael.
"Ro'n i'n 21 yn mynd allan i America a nes i dreulio pedair mlynedd yn Boston.
"Ar y dechrau ro'n i'n gweithio i Bayern Munich naethon ni gael raid gan yr FBI. Roedd hi'n sgandal fawr ar y pryd oherwydd roedd rhywbeth o'i le gyda'n papurau fisa ni fel hyfforddwyr.
"Diolch byth roedd un fi yn iawn, ond wedyn nes i ffeindio gwaith arall yn gweithio i Surf Soccer.
"Roedd na opsiwn wedyn i gael residency yn America ond nes i benderfynu symud ymlaen a ges i waith gyda Juventus," meddai.
Gweithio gyda Juventus yn Kuwait
Mae gwaith Mael gyda Juventus wedi golygu symud i Kuwait, lle cafodd brofiad newydd o fywyd a gwaith caled mewn academi pêl-droed gyda chwaraewyr o wahanol wledydd, gan gynnwys rhai o deulu brenhinol y Dwyrain Canol.
"Mae na lot fawr iawn o bres yn Kuwait a sawl academi allan yno. Ro'n i'n gweithio i Juventus ac roedd o'n waith caled gyda oriau hir.
"Yn Kuwait mae ei dydd Sul nhw fel ein dydd Llun ni, sef dechrau'r wythnos waith.
"Fel arfer o'n i yn y swyddfa o naw y bore tan tua dau y prynhawn yn cynllunio, ac allan ar y cae hyfforddi wedyn drwy'r pnawn tan tua naw y nos.
"I gyd-fynd efo hynny roedden ni yn chwarae gemau ar ddydd Sadwrn.
"Ro'n i'n gweithio efo'r timau ieuenctid ac fe allai ddeud rŵan y bydd 'na un neu ddau yn serennu yn y dyfodol. Roedd na chwaraewyr o Sbaen, yr Eidal a sawl gwlad arall yn rhan o'r academi ac ambell aelod o deulu brenhinol y Dwyrain Canol hefyd," meddai.
Ffoi o'r Dwyrain Canol a dychweliad i'r Bala
Mae Mael bellach yn ôl yn y Bala ar ôl gorfod gadael Kuwait oherwydd y gwrthdaro rhwng Iran ac Israel. Roedd yn rhan o dîm mewn twrnament yn Dubai pan gafodd eu hysbysu bod y digwyddiadau wedi'u canslo a bod rhaid iddynt aros.
"Roedden ni mewn twrnament yn Dubai ac yn eistedd ar yr awyren yn barod i fynd yn ôl i Kuwait. Peth nesaf, sylwi fod na ddim byd yn digwydd a cael ein gofyn i adael a deud fod popeth wedi'i ganslo.
"Roedden ni yn gorfod aros mewn gwesty yn Dubai a rhieni y plant yn gorfod dod i'w nôl nhw.
"Roedd 'na ambell un cyfoethog yn gallu fforddio gyrwyr i ddod i Dubai i'w nôl a wedyn ffoi i'w tai gwyliau mewn llefydd fel Groeg ac ati.
"Pan o'n i'n chwilio am awyren i ddod nôl i Brydain roedden nhw tua £4,000 felly nes i benderfynu mynd i Wlad Thai am gyfnod ar fy ngwyliau," meddai.
Opsiynau a dyfodol Mael yn y Bala
Ers dychwelyd i'r Bala, mae Mael wedi derbyn sawl cynnig i hyfforddi mewn llefydd gwahanol, gan gynnwys cynnig newydd gan Juventus. Fodd bynnag, mae'n ystyried ei gam nesaf yn ofalus ac yn bwriadu aros yn y Bala am flwyddyn i dreulio amser gyda'i deulu.
"Ers cyrraedd yn ôl dwi wedi cael sawl cynnig i fynd fewn i hyfforddi mewn gwahanol lefydd. Dwi'n agored i gynigion ond dwi'n meddwl fy mod am aros adre am flwyddyn.
"Dwi wedi bod i ffwrdd ers yn oed ifanc iawn felly mae hi'n braf cael bod adre a threulio amser gyda fy nheulu," meddai.
Pwy a ŵyr beth fydd nesaf i Mael? Mae eisoes wedi gweithio i bencampwyr yr Almaen, Bayern Munich, a chlybiau enwog yn yr Eidal fel Juventus. Bydd yn ddiddorol gweld pa glwb enwog fydd nesaf ar ei restr.
Dilynwch Cymru Fyw ar Facebook, X, Instagram neu TikTok. Anfonwch syniadau am straeon i cymrufyw@bbc.co.uk neu cysylltwch drwy WhatsApp ar 07709850033. Lawrlwythwch yr ap am y diweddaraf o Gymru ar eich dyfais symudol.
