Posibilrwydd cadw uned strôc yn Ysbyty Bronglais
Mae'n bosibl y gall uned strôc gael ei chadw yn Ysbyty Bronglais yn Aberystwyth, ar ôl i gynigion newydd gan y bwrdd iechyd lleol ar gyfer dyfodol y gwasanaeth gael eu cyhoeddi.
Y llynedd, ymgynghorodd Bwrdd Iechyd Hywel Dda ar gynlluniau i newid y gwasanaeth ym Mronglais o fod yn uned strôc i wasanaeth 'trin a throsglwyddo'.
O dan y cynigion gwreiddiol, byddai gofal strôc arbenigol yn cael ei ddarparu yn Hwlffordd a Llanelli, a chleifion strôc yn cael eu trosglwyddo i'r llefydd hynny ar ôl cael triniaeth yn Ysbyty Bronglais.
Nawr, mae'r bwrdd iechyd wedi ychwanegu dau ddewis amgen - Opsiynau 106 a 210 - i gael eu hystyried mewn cyfarfod yn ddiweddarach ym mis Chwefror.
Yn ôl y bwrdd iechyd, cafodd y dewisiadau amgen eu hawgrymu fel rhan o'r broses ymgynghori y llynedd.
Galw am warchod gwasanaethau strôc Ysbyty Bronglais
Pryderon am gynlluniau i gau unedau strôc
Pe bai Opsiwn 106 yn cael ei ddewis, byddai Bronglais yn newid i gynnig gwasanaeth 'trin a throsglwyddo', ond fe fyddai'n cynnig uned adsefydlu wedi strôc hefyd.
Byddai cefnogi Opsiwn 210 yn golygu y byddai uned strôc yn parhau ym Mronglais ac yn cynnwys gwasanaeth arbenigol 12 awr y dydd.
Dywedodd Mark Henwood, cyfarwyddwr meddygol gweithredol ar Fwrdd Iechyd Hywel Dda:
"Rydym yn cydnabod cryfder y teimlad tuag at y gwasanaethau rydym yn eu darparu ledled canolbarth a gorllewin Cymru.
Gall dioddef strôc fod yn ddinistriol i gleifion a'u teuluoedd," meddai.
"Mae'r dystiolaeth yn glir y gall newid y ffordd y mae gwasanaethau strôc yn cael eu darparu achub bywydau a gwella canlyniadau cleifion."
'Angen newid i ddarparu gwell gofal'
"Mae strôc yn un o naw gwasanaeth sydd wedi'u cynnwys yn y Cynllun Gwasanaethau Clinigol y gwnaethom ymgynghori arnynt yn ystod yr haf," meddai Mr Henwood.
Dwedodd fod "angen i'n gwasanaethau strôc newid i fodloni safonau clinigol ac i ddarparu gwell gofal i'n cymunedau".
Yn ôl y bwrdd iechyd, mae wedi derbyn 4,000 o ymatebion i'r ymgynghoriad a 200 o syniadau amgen i'w hystyried.
Ychwanegodd Mr Henwood y byddai pob opsiwn yn golygu y byddai diagnosis cychwynnol a thriniaeth thrombolysis a allai achub bywydau, yn parhau i gael eu darparu ym mhob un o'r pedwar ysbyty acíwt yn ardal Hywel Dda, gan gynnwys Ysbyty Bronglais.
Ddydd Sadwrn, mae disgwyl i gefnogwyr AGB ffurfio cadwyn ddynol ar hyd un ochr o Ysbyty Bronglais.
Mewn ymateb i'r dewisiadau amgen
Croesawodd Lisa Francis - cadeirydd y grŵp ymgyrchu Amddiffyn Gwasanaethau Bronglais (AGB) - "opsiwn sy'n cadw gwasanaeth adfer wedi strôc llawn ym Mronglais".
"Mae'n siomedig nad oedd modd i'r bwrdd iechyd weld mai dyma oedd y ffordd orau ymlaen yn y lle cyntaf," meddai.
Mae ymgyrchwyr AGB wedi disgrifio cynigion gwreiddiol y bwrdd iechyd ar gyfer newid gwasanaethau strôc yn "anymarferol ac yn beryglus" a "ddim yn addas at y diben".
Dywedodd Ms Francis fod gwrthwynebiad "enfawr ac angerddol" i gynigion gwreiddiol y bwrdd iechyd, oherwydd nad oedden nhw'n ystyried dalgylch ehangach Ysbyty Bronglais, sy'n cynnwys cymunedau yn ne Gwynedd a gogledd Powys.
"Roedd y cynigion hyn gan Hywel Dda yn sylfaenol ddiffygiol o'r cychwyn cyntaf.
Nid oedd digon o fanylion ac roedd yn amlwg eu bod yn anymarferol ac yn beryglus.
Dyw elfen 'trosglwyddo' y cynllun erioed wedi'i hegluro'n llawn ac ry'n ni'n gwybod bod problemau enfawr ynghylch darpariaeth ambiwlansys ac amseroedd ymateb yng nghanolbarth Cymru."
'Cwtsh mawr i Fronglais'
Mae Dr Phil Jones, cyn-feddyg strôc yn ysbyty Bronglais a chyn-arweinydd strôc Cymru, yn cefnogi ymgyrch AGB.
Dywedodd Dr Jones ei fod yn credu bod cynigion gwreiddiol y bwrdd iechyd wedi methu ag ystyried "mynediad cleifion, gofalwyr a pherthnasau / ffrindiau at wasanaethau strôc".
"Nid dyna'r cynllun strôc sydd ei angen. Mae'n brin o arloesedd ac mae'n anaddas at y diben. Dylid bod wedi'i dynnu'n ôl."
Ddydd Sadwrn, mae disgwyl i gefnogwyr AGB ffurfio cadwyn ddynol ar hyd un ochr o Ysbyty Bronglais, er mwyn dangos cefnogaeth i'r gwasanaethau y mae'n eu darparu.
Mae'r ymgyrchwyr yn disgrifio'r weithred fel rhoi "cwtsh mawr i Fronglais".
Bydd Bwrdd Iechyd Hywel Dda yn cynnal cyfarfod eithriadol ar 18 a 19 Chwefror, pan fydd yn gwneud penderfyniadau ynglyn â sut fydd y naw gwasanaeth - gan gynnwys strôc - yn y Cynllun Gwasanaethau Clinigol yn cael eu darparu yn y dyfodol.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
