Mabon ap Gwynfor yw gweinidog iechyd newydd Llywodraeth Cymru
Bydd £120m arall yn cael ei wario ar geisio lleihau rhestrau aros y gwasanaeth iechyd yng Nghymru, ond mewn ffordd mwy "cynaliadwy" na'r llywodraeth flaenorol, meddai'r gweinidog iechyd newydd.
Dywedodd Mabon ap Gwynfor fod y "y llywodraeth ddiwethaf wedi buddsoddi lot fawr o arian mewn atebion byr sydd ddim yn gynaliadwy".
Arweiniodd hyn at y rhestrau aros yn "mynd i fyny a lawr" yn gyson, meddai, cyn pwysleisio bod llywodraeth Plaid Cymru yn cynnig "system a strwythur sy'n gynaliadwy i'r hirdymor".
Ym mis Mehefin y llynedd cyhoeddodd y cyn-ysgrifennydd iechyd Llafur, Jeremy Miles, y byddai £120m yn cael ei wario ar leihau rhestrau aros erbyn yr etholiad ddechrau fis yma.
'Llawer gormod o bobl ar y rhestrau'
Mae'r ffigyrau diweddaraf o ran perfformiad y GIG yn dangos bod y rhestrau aros am driniaeth wedi gostwng ym mis Mawrth, am y 10fed mis yn olynol.
Fe ostyngodd y nifer sy'n aros dwy flynedd neu fwy 42.7% o'i gymharu â mis Chwefror, i ychydig llai na 2,600.
Ond mae'r ffigyrau yn dal yn wael o'i gymharu â Lloegr, ble dim ond dwsinau o bobl sy'n gorfod aros dwy flynedd am driniaeth - gyda Chymru yn y miloedd o hyd.
Pwy yw gweinidogion cabinet newydd Llywodraeth Cymru?
Cynghori parafeddygon newydd i symud dramor gan nad oes swyddi yng Nghymru
Sut mae gwella bwrdd iechyd Betsi Cadwaladr?
"Mae gweld niferoedd ar y rhestrau aros yn disgyn bob amser yn cael ei groesawu, ond mae llawer gormod o bobl ar y rhestrau aros o hyd," meddai Mr ap Gwynfor.
Mae'r ffigyrau hefyd yn dangos mai Bwrdd Iechyd Betsi Cadwaladr yn y gogledd sy'n wynebu'r heriau mwyaf.
Os na fydd y gweinidog iechyd yn "gweld gwella o fewn dwy flynedd, fyddwn ni'n gorfod" ystyried ymyrryd, meddai.
"Dyna be' mae pobl gogledd Cymru'n ei ddisgwyl... dwi'n un o gleifion gogledd Cymru, felly mae'n rhaid i ni weld gwella.
"Byddwn ni'n rhoi'r cymorth angenrheidiol er mwyn sicrhau bo' nhw'n cyrraedd y targedau."
Disgwyl cyhoeddiad yn fuan
Ym mis Ebrill eleni fe ddaeth i'r amlwg bod problem o ran cynnig swyddi i barafeddygon a nyrsys - gyda pharafeddygon newydd yn cael eu cynghori i fynd dramor i chwilio am swyddi.
Yn ystod ymgyrch etholiadol Plaid Cymru dywedodd Mr ap Gwynfor y byddai'n cynnal uwch-gynhadledd fyddai'n dod â gwahanol gyrff at ei gilydd er mwyn ceisio datrys y sefyllfa.
Dywedodd ei fod yn gobeithio gwneud cyhoeddiad yn y Senedd o fewn yr wythnosau nesaf "er mwyn rhoi sicrwydd" i rai o'r bobl hynny, a "sicrhau na fyddwn ni yn y sefyllfa yma eto".
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
